ОН порачува грчката влада да постапува во согласност со пресудите на Европскиот суд за човекови права, и на заедниците треба да дозволи да ги користат зборовите македонски или турски во своите имиња и слободно да ги изразат нивните етнички идентитети
Грчката влада треба да се повлече од спорот за тоа, дали има македонско малцинство или турско малцинство и го насочи во целост својот фокус на заштита на правата на самоидентификација, слободна на говорот и слобода на здружување на овие заедници, се вели во последниот извештај на независниот експерт за малцински прашања на Обединетите нации Геј МекДугал по мисијата во Грција. По посетата од 8 до 13 септември минатата година тие му порачуваат на нашиот јужен сосед грчката влада да постапува во согласност со пресудите на Европскиот суд за човекови права, и на заедниците треба да им дозволи да ги користат зборовите македонски или турски во своите имиња и слободно да ги изразат нивните етнички идентитети.
– На тие заедници кои се негирани во минатото мора неодложно да им се даде официјална регистрација. Нивните понатамошни права на малцинска заштита мора да биде почитувана како што е елаборирано во Декларацијата за малцинствата и јадрото на Меѓународните конвенции за човекови права – се посочува во извештајот, каде стои дека модерна Грција пропагира дека кралството Античка Македонија е дел од грчката историја и грчкото културно наследство.
Посебен дел од Извештајот се однесува на малцинставта во регионот на Лерин. МекДугал наведува дека грчката Влада не признава постоење на македонско етничко малцинство во тој дел на Грција, ниту постоење на македонски јазик иако кај тамошното население се забележливи лингвистички варијации различни од грчкиот јазик.
– Став на официјалната грчка политика е дека митот за македонската нација е создаден во времето на Тито поради експанзионистички причини кон грчкиот дел на Македонија. Владата не дозволува никаква употреба на македонскиот јазик и на културни активности кои се идентификуваат како македонски – стои во извештајот, каде се забележува и дека во 20-30 години од минатиот век биле менувани негрчките имиња на градовите, селата и планините, како и семејните имиња на луѓето кои зборувале македонски.
Ова не е прв извештај во кој се посочува дека Грција не смее да го презира постоењето на македонскот малцинство во Грција и постоењето на македонскиот јазик. Во извештајот за почитување на малцинските права во Грција, подготвен од комесарот за човекови права на Советот на Европа, Томас Хамарберг стоеше дека лицата кои сакаат да го изразат нивниот македонски, турски или друг идентитет се судираат со непријателско расположение од населението во Грција. Светската организација побара од Грција да ја преиспита нејзината позиција во врска со етничките, религиозните или јазичните малцинства кои се наоѓаат на нејзина територија, во согласност со меѓународните норми.
Атина дури и направи обиди да го смени извештајот на европратеникот Ерик Мејер за Македонија, особено делот во кој се бара Грција да не го користи ветото против Скопје во Европската унија. Се посочуваше дека заменик-министерот за надворешни работи на Грција, Јанис Валинакис, од словенечкиот пратеник и известувач за Македонија во сенка, Јелко Кацин добил порака дека извештајот на Мејер е избалансиран, реален и добар и дека Македонија „мора да се извлече од спирала на популизам и национализам, кои и се закануваат на нејзината меѓународна позиција и го забавуваат нејзиниот европски пат“, практично удирајќи го и со грчки камен по глава, бидејќи ветото делумно доведе до тоа.
Кацин му рекол на Валинакис дека Македонија мора побрзо да почне преговори за членство со ЕУ, како единствен начин да и се испрати на државата позитивен сигнал на поддршка и се овозможи друг пристап за развој на односите со соседите.